20201231
喂，點呀今年，有冇嘢要總結。總結嘅意義，係結束一個章節，然而，聽朝一起身，日曆咪又係照舊咁揭，講太多未來都只係假設，只不過係形式上嘅一種發洩，夾硬要定立一啲目標，適逢大時大節。就好似同事喺公司，成日話想撇想撇，十幾年後照舊喺度聽老細總結。
雖然，2019年時你都覺得唔會有咩改變，生活依然、掙扎依然。世界都係冇乜嘢大戰，點知一眨眼，原來連笑容都可以整唔見，生活開始黐線，食餐飯都要走鬼快閃，條街冇晒實體店，出街都可能只係為咗體檢，老細諗盡辦法唔洗俾錢，full time變part time係嚟得幾咁突然。終於發現，原來唯一不變，就係所有事情一直改變。
2020年要過去喇，今年你嘆咗好多口氣，相對都喺屋企嘆咗好多冷氣，成家用多咗好多煤氣。見多咗唔使化妝嘅自己，少咗喺公司聽少咗好多是非，發現以前把口成日都係人哋人哋，最親近嘅人反而冇乜點理。
冇需要承認冇需要否認，你亦可以選擇唔去覺醒，反正地球嘅運轉亦都係唔會暫停。
要改變不如唔好諗聽日，今日。今日就結束你亂七八糟嘅關係，將冇意義嘅人放低唔好再玩兩棲，想做嗰樣嘢就去做唔好再扮搵啲世藝，認真實行，無論成功失敗都冇乜所謂。人一世物一世，你永遠都唔清楚點樣先為之一世，心跳會幾時停低。啲人成日話居安思危，其實冇人定義到安又有幾安，危又有幾危。
計劃未實行就只係估計，你係已經決定咗要休息停低，定還是你仲喺度煩惱緊，聽日要兌換啲乜嘢貨幣？呢一種心態係咪令到你坐到一個安樂嘅茶位，將今年由頭到尾睇一睇，又好似唔係，咁到底，點解到今日你仲喺度諗東諗西，不如做啦契弟。我將哩番說話記低，唔係俾咩人睇，以上只係我嘅工作範圍，如果生活上唔去實行，我同你下年都只會繼續係奴隸。
正視你最愛嘅人，畢竟我地喺宇宙入面只係微塵，能夠相遇相親，搵到愛人，苟且偷生都係一種開心。
Song list:
Mac miller - good news
The Libertines - Music when the light goes out
Pulp - something changed
陳綺貞 - 時間的歌
Eason - 人神鬥
Ning - Obe
Search